Friday, January 26, 2018

Mga malalalalim na salitang Filipino - 2

Alamin at unawain ang ilang malalalim ng salitang Filipinong nasa ibaba:

1. Brokil – (pangngalan) = Bukayo, minatamis na laman ng buko o niyog.
          Halimbawa: Walang nalutong ulam ang Nanay kaya brokil ang inulam ng pamilya.

2. Galapok – (pangngalan) = pulbos na lupang higit na pino kaysa gabok.
          Halimbawa: Huwag masyadong lakasan ang pagwawalis at baka mapuwing ng galapok.

3. Halimunmon – (pangngalan) = bango, halimuyak
          Halimbawa: Nakatitiwasay ng kalooban ang halimunmon ng dama de noche.

 4. Kalukabkab – (pangngalan) = bitak o bakbak sa pader.
          Halimbawa: Pinamugaran ng putakte ang kalukabkab.

5. Sagilot – (pangngalan) = buhol na madaling kalasin.
          Halimbawa: Madaling nakakawala ang kanyang hinuling manok dahil sagilot lamang ang nagawa niyang pantali.

6 Sumbo – (pangngalan) = liwanag ng kandila o lampara.
          Halimbawa: Dahil walang linya ng kuryente sa kanilang nayon, gumagawa ng takdang-aralin si Maria sa pamamagitan ng sumbo tuwing gabi.

7. Tungaw – (pangngalan) =  garapatang maliit at pula o maliit na kuto.
          Halimbawa: Namaga ang kagat ng tungaw sa kanyang braso.

8. Bantulot = (pang-uri) = urong-sulong
          Halimbawa: Bantulot si Mario kung itutuloy ang panliligaw kay Urbana.

9. Anagon – (pangngalan) = mais na mura
          Halimbawa: Naggulay ng anagon si Aling Flora dahil paborito ito ng kanyang mga anak.

10. Damurak – (pang-uri) = nakalilito; nakagugulo.

          Halimbawa: Masyadong damurak ang kanyang isinulat kung kaya’t marami ang nag-aalinlangan sa kanyang katapatan.